تجربتي الشخصيه لترتيب اغراض الابتعاث ،،

حياكم الله ،،

تقريري اليوم عن البعثه  لمدينة ملبورن في استراليا ،، التقرير قررت اكتبه بعد طلب كثير من متابعيني بالانستقرام ،،

عن الابتعاث لملبورن ،، ووش اهم الاغراض الي لازم تكون معنا بالسفر ،، وعن تجربتي الشخصيه فيها ،، 

مــلــبــورن عاصمة فكتوريا، وثانية المدن الكبرى في أستراليا ،،  مدينة متعددة الاعراق، متقدمة وجديدة تتميز باستضافة المؤتمرات والمعارض والالعاب الدولية، اوروبية السمات وانيقة..

المدينه جدا جدا جمييله ،، فيها نشاطات رائعه ،، فيها حدائق ،، فيها شواطئ جميله ،، وفيه مناطق تبعد عنها ساعتين وثلاث ،، فيها شواطئ وجبال خياليه ،، وفيها جبال في البرد تكون كلها ثلوج وتنفع للاقامه فيها كم يوم والتزلج فيها ،، 
وطبعا المطاعم والمقاهي ،، من افضل الي المطاعم الي زرتها فيه حياتي ،، والاكل لذيييذ عندهم ،، لدرجة اني اقول ما اتوقع القى مطعم سيء ،، 

يعني بالعربي فيها كل شيء .. ولولا انها بعيده والمسافه طويله لها ولا كان كل سنه ازورها ،، لانها بلد ممتعه جدا ،، 

والشيء الجميل فيها ،، احترامهم لجميع الاديان فيها ،، مايفرقون بين اي شخص وشخص ،، يعني انا ساكنه بمنطقه جنبي مسجد ،، حتى ان بعض الصرافات عندهم فيها اللغه العربيه (قلووووووب)

وهذا تعريف بسيط عن البلد ،، 

نجي الان لما يجيك قرار الابتعاث ،،  وتبدا تجهز اغراضك ،،

كثير يسألون ،، من البنات وش ناخذ معنا ،، وش اهم شيء !! وش نسوي مع الاكل !! كيف الحجاب هناك !!

اول شىء بعلمكم تجربتي الشخصيه ،، وطبعا من شخص لشخص تختلف ،،

بالنسبه وش تاخذون معكم .. اول شيء اغراضكم الشخصيه كامله ،، ملابس عطور جزم شنط اكسسوارات 

وبعض الادويه الشخصيه ،، وانا جبت حتى الابر الطبيه معي ودخلوها 

وتاخذون بعد فناجيل قهوه ،، وترامس قهوه ،، وسفر للاكل ،، 

نجي للاكل ،، عن نفسي اخذت قهوه ،،وتمر ،،وزعفران ،،وهيل ،، عسل ،، معمول ،، وبهارتي الخاصه ،، 

غير كذا كل شيء موجود هنا بالبقالات العربيه ،، كل شيء كل شيء ،، 

يعني مايحتاج تتعبون نفسكم وتخسرون وتشحنون كل اكلكم ،، 

طبعا الاكل لما تشحنونه لازم تاريخ صلاحيه عليه ،، مع انهم ماقد فتشوني على التاريخ .. بس الاحتياط واجب 

لما جيت اسوي التواريخ ،، ناس قالو لي روحي الرفاعي ولازم تغليف حراري ويحط لك تواريخ كويسه 

انا ما رحت ،، طبعت التواريخ بالبيت عن طريق الوارد بالكمبيوتر  ،، وقسمته على شكل جدول وكتبت اسم كل غرض والتاريخ عليه  ولصقته عليه ،،

مثل ماهو موضوح بهالصوره قدامكم 

بعدها 

اخترت شركة الطيار للشحن ،، ناس قالو لي البريد السعودي ارخص ،، بس ماتطمنت ،، ورحت للطيار واخذت كراتين من عندهم  عشان احط اغراضي فيها واشحنها عن طريقهم ،،

ويعطونكم ورقه بايش الممنوع يدخل استراليا ،، اطلبو الورقه منهم ،، 

الان كثير يسالون بكم الكيلو عند الطيار للشحن ،، لما رحت لهم عشان اشحن الاغراض ،، طلع عندي ١١٣ كيلو ،، 

اول شيء قالو لي الكيلو ب١٢ ريال ،، ونشبت لهم ،، انا زبونه راعوني ،، ومن هالكلام ،، تخيلو وصل الكيلو بكم !!

ب٧ ريال ،، وشحنت الكراتين ب٧٩١ ريال ،، ( فيس يضحك ) 

يعني فرق كبير جدا بين السعر الاول والاخير ،، عموما لو بشحن مره ثانيه بشحن برضو عن طريق الطيار ،، طبعا الاغراض تشحنها قبل سفرتك باسبوعين تقريبا .. عشان تضمن انك توصل البلد وهي واصله او توصل بعد وصولك بكم يوم ،، 

وتاخذون بعد للشحن ،، رشاشات مويه وعدت السباكه ،، عشان لما توصلون ملبورن البيوت حماماتها طبعا مافيها رشاشات وانتم بكرامه ،، 

فشد حيلك عزيزي الذكر ،، وركب لنا رشاش  او شطاف  .. بس انتبهو لازم تركبونه بحذر وعنايه ،، عشان لا يصير فيه تسريب للمويه ،، ويشتكي عليكم صاحب البيت وتوهقوني معكم ،، تقولون ميمو قالت !! 

النقطه الثانيه لما نجي نطلع من البيت والحمامات الله يكرمكم مافيها مويه ،، وش نسوي !! 

لقيت حل مريح وسهل ،، ولا ياخذ حتى مكان بالشنطه عشان لا تضايقون ،،

هذا هو الحل الجميل .. 

شافين العلبه كيف تتسفط وتدخل حتى بجيبك ،، ومنها الوان واشكال 

وتنباع بكل مكان بملبورن بالصيدليات والسوبر ماركت 

تنفع حتى للي يسافرون اي بلد ،، بدل مانشيل علبة مويه معنا 

وهالصوره اهداء لجواهر صديقتي وسفرة نيس  (فيس يضحك) 

تاخذ شنطه كبيره اقولها وش داخلها تقول علبة مويه هههههههه 

الان كثير بنات يسآلون عن الحجاب بملبورن ،، وعن محلات الحجاب في الرياض ،، ووش افضلهم ،، 

الحجاب بملبورن لك الحريه الي تبينه ،، يعني لو تلبسين عباية راس وتغطين ،، محد راح يمنعك ،، او يضايقك او يناظر فيك .. كل انسان بملبورن حر بنفسه وبطريقة لبسه ،، 

الحجابات عن نفسي انا اخذتها من كذا محل بالرياض ،، اخذت من محل باسواق المجد اسمه السويدان للعبايات حجابات حلوه طريقتها باللبس استرتش قطن ،، بس بعد كذا رحت مركز النمر لقيت عندهم حجابات حلوه مره واشكااال والوان وخيارات كثيره في اللبس ،، حتى ملابس السفر عندهم فانصحكم تروحون لمركز النمر على طول  ،، 

الحجابات الي اخذتها مثل الي بهالصوره ،، 

الحين اختيار شنط السفر  ،، شنط السفر اخذتها من محل اسمه تورز ببانوراما بالرياض  ،،

 هي ماركه ايطاليه اسمهاRoncato bags 

مثل  هالصوره ،،

انا اخذت حجمين نفس هالصوره بس كلهم لونهم زهري ،، اسعارهم غاليه شوي بس تستاهل ،، وانصحكم تاخذونها وقت الخصم ،، لان السعر يصير نصه ،، الشنط عمليه جدا ومريحه ،، ومن داخل حلو الترتيب فيها والتقسيم وبعدين محل تورز اذا طلبتو يفصلون لكم اكياس لحمايتها على لون الشنطه ،، 

وهنا شكلها من داخل ،، 

وهنا بعد ماحطيت اغراضي فيها ،، 

وبعد ماشحنت الاغراض عن طريق الطيار ،، ورتبنا الشنط ،، حان وقت الذهاب الى المطار ،، طبعا تجهزون جوازات السفر 

والاوراق الرسميه والفيزا تبع استراليا ،، 

الرحله اخذناها عبر الخطوط الاماراتيه ،، اعتبرها الافضل ،، طبعا تمرون دبي ،، وحسب اختياركم للرحله وكم تقعدون في دبي ،، وبعدها على ملبورن من دبي  تقريبا الرحله ١٤ ساعه  ،، 

بالطياره يعطونكم اوراق تعبونها مثل هذي ..

طريقة تعبئة هالورقه تلقونها هنا بهالرابط ،، 

http://www.mbt3th.us/vb/forum111/thread94260.html#.U-MAI1blfwI

طبعا هي ورقة دخول لاستراليا ،، ويسالونك لو معك اكل ،، او ادويه شخصيه ،، 

الان عبينا الورقه ووصلنا المطار ودخلنا ملبورن ،، تلقى هاللوحه تقولك ،، 

وبكذا اكون خلصت تقرير ملبورن ،،  لو نسيت شيء باذن الله برجع اضيفه بهالموضوع ،، 

والي حاب يفيدنا بشيء ياليت يعلق بهالموضوع عشان الكل يستفيد .. 

وشكرا

،،،