breville barista express آلة القهوه المنزلية بريفيل بريستا

اليوم بنتكلم عن موضوع الاغلب كان ينتظره مني خاصه بالسناب .. وتقريبا شبه يوميا تسألوني عنه ،، 

راح اتكلم عن الة القهوه بريفيل بريستا اكسبرس ،، 

اول شيء انا هاويه للشئ هذا ولا انا محترفه فيه وخبرتي بسيطه فيه ومن كثر ماانتم تقولون لي علمينا عن الاله ميمو وعطينا 

رأيك قررت احطها لكم بالمدونه ،، لذالك معلوماتي على قدي وباذن الله تكون مثل اساس لكم وانتم بعدها تبدعون ،، 

ثاني شيء راح احط لكم نهاية الموضوع وروابط وحسابات ناس مختصه بالقهوه وتفيدكم ،،

حتى شرح للآله وطريقة استخدامها .. 

طبعا حبي للقهوه شيء جديد بالنسبه لي ،، واكثر شيء حبيتها بعد ماعشت باستراليا ( ملبورن ) لان بالنسبه لي اجمل  

وافضل القهاوي كانت عندهم ،، فلما رجعت ماتوقعت بيوم اني اشتري آلة قهوة للبيت ،، لان الآله موجوده باستراليا وبسعر 

ارخص بكثير من هنا ،، نجي الان لآكثر سؤال مهم 

بكم اخذتي الاآله ياميمو ؟؟ ومن وين ؟؟

اخذتها من محل بطريق الملك عبدالعزيز (الرياض ) اسمه 12 CUPS  هو اصلا محل قهوه مختص ويبيع الاله  سعرها 

عندهم تقريبا 3500 ريال 

طبعا هذي الاله وشكلها مصنوعه من الاستاينلس ستيل  ،، حجمها مناسب جدا خيار ممتاز للي يحبون القهوه في البيت 

وسعرها متوسط ومناسب ،، الحلو كمان ان المطحنه تجي منها وفيها  ،، يعني بعض الالات تجي لحالها المطاحن ،،

وهذا بحد ذاته توفير   ،،

بس لو ميزانيتكم تسمح في الات افضل منها ومختصه اكثر ،، بعد سنه باذن الله ناويه اشتريها

اسمها  la marzocco linea mini

وركزو اني قلت فيه الات افضل من البريفيل بس عشان انا عندي الاله 
وجربتها تكلمت عنها وعن تجربتي لها 
لا احد يجي يقول لي فيه كثير يذمون البريفيل من مختصين القهوه 
اكيد بيذمها اذا كانت عنده اله مثل لامرزكو او روكيت 
مافي مجال للمقارنه 

نرجع لألتنا ،، طبعا هي تسوي ايسبرسو ولاتيه وكابتشينو وفلات وايت وكورتادو وغيره من المشروبات تبع القهوه 

هل تسوي بارد  مثل الة دولتشي غوستو او نسبرسو حق الكبسولات ؟؟

لا ماتسوي لانها تحظر قهوه طازجه وبُن انت تطحنه بنفسك لكن ممكن تخلونها قهوه بارده اذا اضفتو لها ثلج وسويتو

ايس موكا ،،

هل نقارنها بالكبسولات ؟؟

طبعا لا هذي شي والكبسولات شي ثاني 

وش افضل بالنسبه لك ؟؟

طبعا بريفيل ولا في مقارنه 

طيب تعرفين آلات ثانيه غير بريفيل جربتيها ؟؟

للاسف لا جربت زمان فقط لمدة اسبوعين تقريبا الة ديلونجي كانت متوسطه نوعا ما 

هل تنصجحين في بريفيل ؟؟

نعم انصح فيها 

الازرار اللي بالاله من اليسار الى اليمين 

power - تشغيل

grind amount - كمية القهوه اللي تنزل 

                          single  - السينغل يعني شوت واحد من القهوه ( كاني بقول ملعقه او ملعقتين قهوه )

dubol - يعني دبل القهوه مرتين 

والثلاث ازرار الاخيره واحد للبرمجه والاخيره دبل وسينغل حسب اللي اخترته سابقا

وهذا البورت فلتر ( port filter )  الاساسي اللي يجي مع الاله طبعا يجي معها واحد بس

والباسكت نوعين وحده ون شوت والثانيه تو شوت ( دبل وسينغل ) 

ليش انتي عندك اثنين ؟؟\

لان اشتريت واحد يسمونه نيكد بورت فلتر ( naked port filter )  النيكد يكون من تحت مقصوص مافيه شي القهوه

تنزل على طول،،

هل يفرق بالطعم ؟؟

يفرق شي بسيط للي يحب القهوه كريميه اكثر ،، ويساعد انه وانت تضغط البن يبين لك اذا درجة الطحن مناسبه واذا 

ضغطتها بشكل صحيح وتنزل القهوه بشكل صح معك ،،

من وين اخذتيه ؟؟

من حساب بالانستقرام هذا هو specialty_hub

يشتغل على البورت فلتر ويقصه لي لان حجم هذا ٥٤ وصعب نلقاه باي مكان حتـي اون لاين 

مايتحصل ويمكن تذكرون لما كنت ادوره معكم بالسناب ولا لقيت الا هالحساب يسويه لنوع اللي عندي ،،

هذي صورة النيكد شايفين كيف مكشوف ،،

وهذا العادي اللي يجي مع الاله،، انا استخدمه غالبا مع السينغل 

نجي الحين لانواع البن اللي جربتها 

انا استخدمت انواع كثيره للبن ،، من الرياض ، لندن ، ملبورن ، ماليزيا ، دبي ( مقهى استرالي )   اغلبها للامانه تجنن 

طبعا نوع البن للاسبرسو اللي بالصوره من مقهى استرالي يوفره نفس الحساب اللي اخذت منه البورت فلتر النيكد

لذيذه بس نهاية القهوه فواكه ،، وانا مو من عشاق الفواكه لكن مايعتبر عيب فيها لان ناس كثير تحب هالطعم 

المسأله مسألة مزاج لهم 

مان كوكو الجمال كله بالنسبه لي ،، محمصه بريطانيه من مانشيستر لذيذه جدا واذا لكم احد هناك خلوه يجيب لكم 

قهوة كاريبو ،، كانت الحب الاول كاريبو طبعا مو مقهى مختص .. بس الـي الان احب قهوتهم مره واحب البن عندهم 

بيت التحميص محمصه سعوديه بالرياض جميله جدا حبيت نوع عندهم اسمه  جافا لذييييذه 

اورانج مق  محمصه سعوديه بعد بالرياض ،، لذيذه قهوتهم فيه عندهم نوع للاسبرسو حلوه مره اسمها ارغاتشيف

وفه نوع قهوه من مقهى استرالي بدبي اسم المقهى sum of us لذيييييييذه جدا بس ماعندي صورتها للاسف 

نجي الان لدرجات الطحن في القهوه 

في الاله راح تلقون مؤشر على الجهه اليسار فيه درجات طحن للبُن من ١ الى ١٦ درجه  طبعا طبعا الرقم من ١ انعم شي وكل ماازاد الرقم تبدا تخشن الطحنه الى ماتوصل الى ١٦ وهي اخشن شي ..

  

طيب كم درجة الطحن المناسبه ؟؟ وهل تأثر على طعم القهوه  ؟؟

عشان نعرف درجة الطحن المناسبه لاي نوع من انواع القهوه لازم نعرف الاداة المستخدمه في القهوه وطبعا احنا هنا يهمنا الاسبرسو لان الآتنا تسوي الاسبرسو  ،، فدرجة الطحن تأثر على استخلاص القهوه فكل ماكانت الطحنه مناسبه كل ماصار عندنا قهوه مضبوطه ،، وابالعاده ينصحون بدرجة طحن 5 للاسبرسو كبداية ،، 

واذا كان الاستخلاص سريع مره نعمو الطحنه واذا كان بطي مره خشنوها .. وطبعا كل نوع قهوه له درجة في الطحن حسب نوع البن وحسب حمصته  ..

نجي الان لكبس القهوه .. 

بعد مانطحن القهوه نكبسها بالتامبر اللي هو هذا 

وهذا يجي مع الماكينه نفسها يسمونه تامبر (tamper ) او الكابس اللي يكبس لنا البن في الفلتر  عشان نستخلص صح 

ونبدا نسوي قهوه صح نستخلص البن ويطلع لنا الاسبرسو مضبوط وانا هنا استخدمت فلتر مكشوف 

وهذا هو الاسبرسو اللي طلع معنا ،، 

دائما اقول اللي يشربون الاسبرسو لحاله بدون حليب ناس مزاجهم  عالي جدا ،، وطبعا البلاك كوفي 

لان اساس القهوه هذا لاي مشروب تحبونه بس طبعا يختلف انواع حسب كمية الحليب وكمية الرغوه 

فدائما اللاتيه اخف رغوه من الكابتشينو ،، والفلات وايت اخفهم 

نجي الان لتسخين الحليب وهي اهم عمليه عشان يصير عندنا قهوه صح ونقدر نرسم عليها ،،

هل الرسم ضروري للقهوه ؟؟ وهل يغير طعمها ؟؟\

الرسم مو ضروري للقهوه ولا يغير بطعمها انا اقدر اسوي قهوه بطله بدون رسم عليها ،، هو شي زايد فقط زي الديكور للاكل

يعطيها شكل حلو ويحسسك انها مشهيه اكثر ،، يحتاج تدريب مرررررره كثير 

طيب كيف نسخن الحليب مضبوط ؟؟ 

الآله معها فروثر ( frother )  اللي هو نسخن الحليب فيه .. والحليب طبعا  نحطه بابريق خاص اسمه البيتشرز ( Pitchers )

وهذي صورته 

طبعا يجي احجام واشكال وانواع كثيره بس كلها خاصه للحليب تبع القهوه 

اللي بالصوره من حساب بالانستقرام يطبع لكم اسمكم عليه هذا هو  baristaspace.official/

طبعا نملي الابريق للنص تقريبا ونبدا نسخن الحليب ،، وبحط لكم رابط بالاخير للطريقه الصحيحه لتسخين الحليب 

كيف نصنع حليب مثالي للقهوه ؟؟

اول شي نستخدم حليب طازج ويكون باااااارد وبعضهم يحطون ابريق الحليب نفسه بالثلاجه عشان يبرد 

ليش حليب بارد ؟؟

لان نبغى نطول عملية التبخير للحيب مانبغاه يحتر على طول فيعطينا قوام كثيف وكريمي للحليب 

طيب كيف اخليه كريمي ؟؟

خلي الحليب يتبخر صح ويقلب معك  داخل الابريق من البدايه للنهايه ،، يعني يدور كثير 

والان عندنا اسبرسو مضبوط وحليب  تبخير تمام ،، نخلط الحليب مع الاسبرسو ونبدا نرسم على القهوه 

والذ كوب قهوه ممكن تذوقها من ايدينك لها طعم ثاني ..

ميمو هل فيه كوفي بالرياض يسوي مثل قهوتك ؟؟

اكثر سؤال يجيني هذا ،، للاسف مافيييييه مثل قهوتي :)

عسسسسسسل .. اممممممممم

نجي الان لادوات القهوه .. ومن وين نقدر نشتري الاكسسورات الخاصه للقهوه مثل الاكواب وغيرها 

الاكواب كثيييير انسئل عنها ؟؟

تلقونها باغلب محلات القهوه المختصه بالرياض مثل خطوة جمل واورنج مق  وبيت التحميص

وحتى امازون تقدرون تطلبونها اون لاين ،،

اخر شي حابه اقولكم ان القهوه فن ومزاج ،، يعني يمكن مو من اول مره تضبط معكم لكن تحتاج محاولات كثيره مره 

مو اذا ماضبط معكم تقولون خلاص مانعرف ،، انا جلست فتره احاول ويمكن اللي معي بالسناب عارفين هالشي 

لذالك لاتقولون مانعرف حاولو مره ومرتين وعشر ،، الى ماتضبط معكم 

وهالموضوع طبعا معلوماته بسيطه على قدي اتمنى يفيدكم ولو بشي بسيط ،،،

اخر شي حابه انكم تنشرون الموضوع لاني تعبت والله عليه ،، وبحط لكم روابط لمواضيع وناس تفيدكم بالقهوه 

اشكركم من كل قلبي لثقتكم ..

شرح الة بريفيل متكامل

حساب يعلم الرسم على القهوه

بريستا ابو ادم

تبخير الحليب

وهذي صوره توضح لكم الفرق بين اسماء المشروبات 

...