تجربتي مع الحماصة HOTTOP

السلام عليكم ..

من سنه مثل هالوقت قررت اني اتعلم تحميص .. ولما قررت في وقتها كثير ناس عارضو الفكره وقالو لي انه هالشي متعب جداً .. وليش اصلا مايحوج الموضوع .. لكن بما اني اذا مسك شي براسي لازم اسويه ،، مشيت بموضوع التحميص لانه كان الموضوع شغف بالنسبه لي ،، الانسان دايم يقدر على كل شي اهم شي يحط هالشي براسه ،، واليوم بعد مرور سنه 

قاعده اجهز لكم موضوع كامل عن التحميص ،، وهذا بحد ذاته انجاز ونجاح 

هالموضوع اليوم اعتبروه موضوع للمبتدئين للناس اللي حابه تاخذ فكره مبسطه جداً عن تحميص البُن ،، طبعاً العام لما كنت ابحث عن مواضيع للتحميص ،، المحتوى العربي مافيه شي ابداً اغلب المواضيع والفيديوهات اللي كنت القاها للاجانب ،،

للاسف المحتوى العربي كان صفر مافيه احد تكلم بشكل لو مختصر او مبسط.. عن التحميص .. فكانت اغلب المواقع والفيدوهات اجنبيه بحطها لكم بعدين .. لذالك ب اذن الله هالموضوع يكون اضافه للمحتوى العربي ..

اول شيء لما قررت اتعلم التحميص ،، بحثت بالموضوع كثير قبل اشتري آلة حمص .. فكنت محتاره بين نوعين من الآات

الحمص بين وحده اسمها 

Bullet R1

واللي عندي 

Hottop Coffee Roaster 

وكان الخيار على الهوت توب ..ليش ؟

البولت ممتازه جداً لكن سعرها مبالغ فيه توصل تقريباً الى ١٥ الف اذا مو اكثر 

الهوت توب اقل بكثير بالسعر  

غير اني مبتدئه فماكنت ابغى آله غاليه لاني ممكن اتطور مع الوقت وبعدين اخذ شي غالي ،،

فكان القرار على الهوت توب ،،

هل تنصحين فيها للمبتدئين ؟؟

نعم وبقوه وكحماصه منزليه اعتبرها ممتازه وتقدرون تطلعون بنتائج ممتازه فيها ،، غير انه انتشرت كثير هالفتره حتى محامص كبيره صارو يستخدمونها لتحميص العينات ،، 

طيب وين نلقاها او مين يبيعها عندنا ؟؟

سبشلتي هب هم اللي يبعونها وانا اخذتها من عندهم وهذا موقعهم 
https://www.shub.coffee

غير انهم يوفرون اكسسوارات قهوة وبُن اخضر 



طيب طريقة استخدامها كيف ؟؟

هالفيديو بيشرح لكم بالضبط كل شي ،،

شرح كامل عن حماصة الهوت توب


كثير لما اصور بالسناب طريقة التحميص يقولون لي ليش يكون فيها رسم بياني وتخطيط الموضوع نحسه معقد !!

بالعكس اقولكم هالشي جميل جداً وسهل مجرد انك ماتدرس الموضوع شوي وتفهمه 
الرسم البياني بالتحميص هو مجرد شي توضيحي يعلمك وش قاعد يصير داخل الحماصه 
من حرارة الحماصه وحرارة البُن ..

وهذا نموذج للبروفايل في حماصة الهوت توب لبرنامج الارتسن

بتكلم عنه بشكل مختصر ومبسط

لازم نفهم ان البُن الاخضر يحتوي على احماض بروتينات سكريات وكافيين وعشان نبرز النهكات هذي الموجوده في حبة البُن نقوم بعملية التحميص ..لانها تنتج تفاعلات كيمائيه تخلق لنا الطعم الموجود في حبة البُن .

الخط الاحمر يعبر عن حرارة الحماصه .. والخط الازرق يعبر عن حرارة البُن داخل الحماصه
اول مانحط البُن داخل الحماصه طبعاً البُن بارد لذالك تبدا تنزل حرارة البُن في الخط الازرق
والبرناج على طول يعطيك تشارج charge وشوي شوي البُن يبدا يكتسب حراره من الحماصه 
بعدها تبدا النقطه اللي يتحول فيها اتجاه منحنى قياس حرارة البن داخل الحماصه من تناقصي لتصاعدي تسمى نقطة التحول turning point 

بعدها تبدا عملية الحمص اول ماتمتص القهوة الحرارة يتحول اللون الى الاصفر ثم الى درجات اغمق وتبدا الحراره بالارتفاع لحد ماتوصل لل first crack
وهو عباره عن صوت يحدث داخل الحماصه يشبه لصوت فرقعة الفشار الصوت يشير الى ان حبوب البن بدأت في الاقتراب من النهايه بالنسبه للحمص الخفيف الى المتوسط .. معناته بتكون جاهزه بعد الفرست كراك .. 


تقريباً هذا الشئ اللي  يصير داخل الحماصه بشكل بسيط جداً

طبعاً في كل مرحلة من المراحل هذي تمر حبوب البُن بعدة عمليات هالشي يطور النكهات المعقده الموجوده في حبة البُن وحسب خبرة الحمّاص وكيف يطور هالنكهات 

كوب القهوة اللي تشربه يومياً يمر بمراحل كثير عشان يوصلك بهالشكل اللذيذ 
من اختيار البن للتحميص لتذوقه لصنع الكوب .. صدقوني لما تمرون بهالمراحل كلها رح تستمتعون بهالتجربه انه الشغف عندكم وصل لكذا .. وخلاكم تصنعون كوب قهوة لذيذ صُنع بحب ..

اتمنى انكم استمتعو بهالموضوع ،،