la marzocco linea mini آلة لامرزوكو لينيا ميني

حياكم الله

اخيرا بعد طول انتظار الموضوع اللي الاغلب كان ينتظره ،،ادري تأخرت عليكم فيه لكن بأذن الله انه يكون موضوع شامل عن

الآله والقهوة  ،، والمعلومات حسب خبرتي في هالمجال ،،

اول شيء هذا رابط موضوع قديم نزلته بالمدونه عن الاله القديمه للي حاب انه يستفسر عنها ،،

http://memokitchen.blogspot.com/2017/08/breville-barista-express.html

ثاني شىء اول سؤال يجي ببال الجميع انه ليش انتي حبيتي تغيرين الآله او ليش اشتريتي آله جديدة ؟

ليش حبيت اشتري آله جديدة لاني حسيت اني تطورت جداً في اعداد القهوة وحسيت اني احتاج آلة تخدمني بهالشيء

تكون آلة احترافية .. وحسيت ان البريفيل الاله القديمة ماتعطني القهوة بالشكل اللي ببالي ،، فقررت اني اشتري جديدة ،،

لكن مايعني ان البريفيل الة سيئه او ماتنفع للقهوة ،، والدليل اني قعدت استخدمها لمدة سنه وكثييير اشوفهم يستخدمونها

ويسوون فيها قهوة ممتازه ،، واغلب الاجانب يستخدمونها في بيوتهم ..

ليش اخترتي لامرزوكو بالذات ؟

اداء ،، قوه ،، اناقة

هل فيه شيء افضل من اللامرزوكو ؟

بالنسبه لي لا هي الافضل على الاطلاق لحد اليوم ،،

من وين اشتريتي اللامرزوكو او من وين ممكن نشتريها ؟؟

انا اخذتها هي والمطحنة واكسسواراتها من سلالات القهوة .. واللي مايعرف سلالات القهوة .. هم محمصه سعودية مختصه

للقهوة ..وعندهم موقع اونلاين يبيعون فيه الاات القهوة  انواع البن واكسسوارات القهوة ،، بحط لكم حساباتهم وموقعهم عشان

تشوفونه ..

ليش اخترتي سلالات القهوة ؟؟

اللي يميز سلالات القهوة عن غيرهم من اللي يبيعون الاات القهوة .. خدمة مابعد البيع عندهم ممتازه جدا ،، يعني مثلاً

اشتريت الاله منهم وصار فيها عطل بسيط يسوون لها صيانة ويجونك للبيت مايحتاج تشيل الاله  ..واذا عطل كبير يستبدلون

الاله لك باله جديده

وهذا موقع سلالات القهوة ،،  عشان تشوفون الاله وسعرها

https://www.varietalcafe.com

وهذا حسابهم على الانستقرام ..

https://www.instagram.com/varietalcafe/

 .. وعندهم انواع كثيرة قهوة هم يحمصونها انصحكم بقهوة مخرج١٣ وقهوة شلشلي

نجي الان بعد مااشتريت الاله .. كثير كانو يقولون لي انها قفزه كبيره ياميمو مابين البريفيل واللامرزوكو يعني فرق بين

الثنتين لكن كنت اقول لا اكيد اني اقدر واعرف لها .. بحكم اني تطورت باعداد القهوة .. بعد مااشتريت اللامرزوكو

فهمت انه فعلاً قفزه كبيره بين الثنتين .. فهمت انه البريفيل كانت عالم ثاني .. واللامرزوكو عالم اخر .. لقيت حتى طريقة

استخلاص القهوة غير فيها .. وماكنت قبل استخدم ميزان وكميات مدروسة للقهوه .. يعني البريفيل كنت اضغط زر وتطلع

لي قهوة .. اللامرزوكو يدويه انا اتحكم بكمية الاستخلاص وبالوزن المثالي للاسبريسو ..

ورجعت كأني من جديد اتعلم للقهوة وطريقة اعدادها بمكائن مختصه وبروفشنال ..

طيب وش الصعوبة اللي واجهتك باللامرزوكو ؟؟؟

اول صعوبه .. انه مالقيت مواضيع تتكلم عن الاله كثير وبشرح مفصل من الالف الى الياء ..اعتمدت على السؤال واحيناً

حتى لما كنت اسئل حقين القهوة مايعطوني رد مناسب او رد واضح وصريح ..

ثاني شي .. الاله حجمها كان اكبر من البريفيل واثقل فلما جبتها كان الدولاب اصغر بكثير منها .. فقررت اني اشتري

دولاب كبير للآله .. والدولاب خصصت له فقره معينه اتكلم عنه ..

ثالث شيء .. ان الاله تشغيلها وطريقة اعداد القهوة فيها كانت تختلف كلياً عن البريفيل مثل ماقلت لكم .. حتى البورت فلتر

كان اثقل واكبر والتحكم بالبدايه فيه كان صعب .. حتى درجة حرارة المويه في الاله بالبداية كنت حاطتها اعلى شي ولا ادري

انهم مفروض يخلونها بين٩٢ و٩٣  ..

 يعني كانت الحراره عاليه مره وكانت تطلع لي بن طعمه فحم .. وكنت اسئل ليش ؟؟

فكانو يقولون لي غيري الطحنه .. الى ماشفت بالصدفه بسناب شخص عنده الاله انه حاط درجة الحراره على ٩٢

هل تنصحينا اننا نشتري الاله ؟؟

اذا انت شخص محترف بالقهوه وشاطر في اعدادها طبعاً انصحك .. اما اذا انت شخص مجرد تبغى تشتري الاله عشان

فلان عنده وفلان عنده .. ماينفع هالشيء .. لان انا كانو ناس يجوني بالسناب يقولون نبغي نشتري الاله مثلك شهتينا فيها ..

طيب تعرفون تصلحون قهوة !! لا مانعرف بس نبغى نفس آلتك !!

طيب هل فيها مطحنه الاله ؟؟

لا الاله من غير مطحنة مو مثل البريفيل .. يعني تشترون مطحنة خاصه للاسبريسو

وش نوع مطحنتك ؟؟

مطحنتي كومباك Compak E6

هل هي الافضل ؟؟

ماعرف لاني ماجربت كثير مطاحن غيرها جربت مطحنه اسمها mythos 1  ممتازه بس سعرها غالي ولا تسوي تكتلات

لما تطحن البن .. عكس الكومباك اللي اعتبره عيب فيها انها تسوي تكتلات .. مع انه الكثير مايعتبره عيب ويقول عادي نفك

التكتلات بعود اسنان وتنتهي المشكله

ولما وصلتني المطحنه اول مره لقيت ان فيها بُن وكأنها مستخدمه من قبل .. لكن لما سألت لقيت ان المصنع اصلا مايطلع

المطحنه من عنده الا لما يكون مجربها قبل .. وان مافيها مشكله .. لأن حتى فيه بالسناب عندي سألوني عن هالشي

ويحسبون انهم اشترو مطحنه مستعمله .. فقلت اذكر هالمعلومه عشان تفيدكم ،،

الحين نجي لما وصلت الآله البيت ..طبعا الآله اشتريتها وبنفس الوقت استلمتها  .. والمطحنه ماكانت متوفره .. لذالك سلالات

ماقصرو عطوني مطحنه من عندهم مؤقتا لحد ماتوصل مطحنتي .. وكان نوعها براتزا ..

لما وصلت الاله كان عندي  دولاب صغير .. وحجم الاله يعتبر اكبر من الدولاب وتعتبر ثقيله لذالك قررت اشتري دولاب .. يتحمل

الاله ويكون شكله حلو .. وجلست ادور تقريبا مدة شهر .. حتى اللي معي بالسناب كانو يرسلون لي صور دواليب كثيرهلآلات قهوة

 ،، بس للأسف ماكانت تنفع .. ليش ؟؟

اولاً انا كان ببالي خشب معين وكنت ابغى نفس اللي ببالي ..

ثانياً .. اغلب اللي ارسلو الصور كانت لألات قهوة مثل نسبرسو ودولتشي الاات قهوه صغيره وخفيفه .. وانا اللي عندي كبيره

وثقيلة .. لذالك نصيحه للي عندهم مثلي ،، اختارو دولاب يكون خشب صح ..ويتحمل ثقل الآله عشان لاتهبد عليكم ..

غير كذا انا كان لازم اختار ارتفاع معين عشان وانا اسوي القهوة لايتعب ظهري ولا انحني .. يعني يفضل لا يقل عن ٨٠ سم

ومايزيد عن ٩٥سم .. وكل انسان حسب طوله والمناسب له طبعاً .. وكنت ابغى دولاب بدروج كثيره

لان اكسسوارات الاله وملحقاتها كثيره .. عشان كذا قعدت فترة ادور لحد مالقيت الخشب المناسب .. واللون المناسب  وكان

من رومز (محل اثاث بالرياض ) وهذا شكله ..

يعتبر عملي جداً..والخشب بالطبيعه جميييل جداً وكثير سأالوني عنه بالسناب ولحد اليوم ..

وهذا الخشب عن قرب ،،

 طبعاً كثير نصحوني اني اسوي قطعة قزاز فوق الخشب عشان تحميه وقت الشغل .. لكن انا

رافضه  تماماً .. لاني اصلاً اشتريت الخشب عشان استمتع بشكله ولونه فماابغى اغطيه .. حتى بالتصوير يعطي منظر

جميل ،،

الآن وصلت الاله ووصل الدولاب ووصلت المطحنة .. نجي لتحظير القهوة ..

البريفيل .. كانت ضغطت زر وتستخلص القهوة ون شوت تو شوت .. اللامرزوكو اول شي نطحن البُن .. كل باسكت تلقون

مكتوب عليه كم جرام يشيل .. نقول مثلا ١٨ جرام بُن ( توزن بالميزان ) .. تطحنها بالمطحنه وتكبسها بالتامبر ..

وتستخلص ،،

دبلها .. يعني ٣٦  خلال ٢٠ الى٣٠ ثانيه ..( عشان كذا استخدم الميزان احسب كم نزل من القهوة عند الاستخلاص ..

وخلال كم )  هذا كلام بشكل مبسط وعلمي ويحبونه حقين القهوة ..

لكن لان المسألة مسألة ذوق وحسب ذائقتك .. انا مااهتم لهالكلام .. واسوي شي حسب الطعم اللي احبه وممكن ازيد وممكن انقص ،،

هل تسوي الآله مشروبات بارده وحاره ؟؟

الآله للأسبريسو فقط .. اي مشروب يدخل فيه الاسبريسو ينفع ..مثلا بسوي كورتادو او لاتيه او فلات وايت او كابتشينو

حتى المشروبات البارده اللي نحط حليب وتشوكلت وثلج ونعمل فوقها شوت او شوتين اسبريسو ..

كيف يتم تسخين الحليب ؟

الآله فيه طبعاً ذراع لتسخين الحليب .. اللي هو الاستيمر .. يجي باربع فتحات لتسخين الحليب بسرعه عاليه جداً .. وهذا

كان صعب علي بالبداية لان الحليب يسخن بسرعه مره .. ولا ياخذ وقت عشان يقلب لانه كل ماقلب الحليب كل ماكان قوامه

كريمي اكثر والذ .. وانا عشان يصير كذا ماابغاه يسخن بسرعه .. فكانت عندي مشكله بالتبخير بالبدايه

افضل انواع الحليب اللي استخدمتيها ؟؟

عن نفسي جربت شركات كثيرة جداً افضلها وساعدني بالرسم وقوامه كريمي كان نجديه .. لكن عيبه مايتوفر بكل مكان ..

وترى جربت المراعي ونادك والصافي .. وطويل الاجل ماحبته

طبعاً طريقة  اعداد القهوة يبغى لها موضوع كامل لحاله .. نتكلم بشكل مفصل عن كل شي .. حتى انواع البُن اللي اعجبتني

لكن هالمره بحط لكم فيديو كامل عن الاعداد .. باذن الله بيعجبكم ..والمرات الجايه انزل موضوع عن الاعداد كامل ..

وعن طريقة تنظيف الاله ،،

اخر شي حابه اذكركم ان آلآات القهوة تحتاج ميزانيه كبيره .. وحسب ميزانيتك انت تشوف وش المناسب لك .. فيه ناس كثير

يشترون الآله لمجرد انهم يبغون لامرزوكو .. وللاسف مايكون عنده خبرة كافيه انه كيف يتسخدم الاله

وهالآلات تحتاج طواحين ممتازه معها .. ماينفع انه تمشي حالك باي طاحونه .. عشان تطلع بنتائج ممتازه ..

وهذا فيديو بسيط .. اتمنى يعجبكم عن طريقة الاعداد باختصار .. 

،،