غرفة اميراتي ،،

حياكم الله ،،

اخيييييييرا الموضوع اللي الكل كان ينتظره ،،، 

وهو موضوع غرفة اميراتي ،، 

اول شي الغرفه مساحتها مو كبيره ،، وانا لما قررت اسوي الغرفه ،، كنت ابغى اسعار مناسبه لي ،، لان هالغرفه شبه 

مؤقته ،، باذن الله خلال سنه او سنه ونص ننقل لبيت اكبر ،، عشان كذا ماحبيت انها تكلفني ،، 

وكان فيه ببالي كذا شيء ،، وكثيير قالو لي خلاص دام تبغين شي معقول روحي ايكيا ،، بس انا ابداا ماحب غرف ايكيا 

لاني احس كل الناس عندهم نفس هالغرفه ،، 

فجلست ادور على اغلب محلات الاثاث بالرياض ،، واللي متابعني بالسناب عارف اني جلست قريب الشهر ادور بالمحلات 

وكانت ببالي فكره لقيتها بالمنزل ،، لكن مشكلة المنزل اسعاره غاليه وانا هالغرفه مؤقته ،، فقلت مالي الا نجار يسوي لي اللي ببالي ،، 

وفعلا رحت نجار وراح تشوفون التفاصيل بالصور ،، وباذن الله تعجبكم ،، 

اخترت اني اسوي الغرفه كلها ورق جدران ،، واخترت ثلاث جدران ساده وواحد مشجر بورد صغير ،، اللون ازرق فاتح 

سويته بمحل بمخرج ٩ ،، بس ماحسيت شغلهم متقن مرره ،، لاننا جربنا القفاري وجربنا شارع الخزان وكان الشغل 

افضل ،، كلفتني الغرفه ١٨٠٠ ريال 

اما الموكيت فآنا من الناس الي تقدر الموكيت خاصه في غرف النوم احسه يعطي فخامه ،، واخذته انا من النافع للموكيت 

كان سعره بالف ريال ،، 

 اعتمدت بالالوان انها تكون ازرق وزهري واخضر ،، وماحبيت انها تكون اوفر بالاثاث حبيت البساطه وبنفس الوقت فخم ،، كانت ببالي ستاره مرره حلوه 

لكن حسيت انها بتكلفني ،، قلت خليها باذن الله بعدين واخترت هالستاره واخذتها من هوم سنتر سعرها للوحده ٢٩٠

والورد اخذته من ايكيا ،، 

وهذا شكل الستاره من فوق ،، 

    

تخيلووو ان اول شي اخترته بالغرفه كلها قبل ورق الجدران وقبل اي شيء هالكنبه الصغيره ،، 

وعليها اخترت تنسيق الغرفه وتنسيق الالوان .. 

اول ماشفتها وقعت بغرامهاااا ،، وعلى طول اشتريتها وانا حتى مدري وين بحطها ،، 

والحمدلله كان اختيار موفق ،، 

اخذتها من ميداس كانت بالف وشي وصارت ب٧٠٠ سعرها يجنن بعد الخصم صار 

عموما يابنات ميداس ترى اغلب بضاعته تجنن والله ،، خصوصا غرف الاطفال ،، 

حطيتها عند جدار كان ساده ومساحه فاضيه ،، وحطيت اطارات للصور فوقها الاطارات من روائع المكتبات ،، والاحرف من ماماز اند باباز ،، 

وسعر المخدات ترى غير عن الكنبه ،، 

ومن جهة اليمين للكنبه ،، حطيت سلة ،، وارفف 

السله اخذتها من روائع المكتبات ،، والبيت الخشب من ملبورن kmart

فوق هالسله ،، حطيت رفين ،، 

اخذت الرفوف من ايكيا لكن الحامل من ساكو ،، 

وهذا الرف الثاني ،،

العلب اخذتها من دبنهامز ايام التخفيضات ،، ومااذكر سعرها بكم والله ،، الارفف احس اني ماخلصت تماما منها ،، باقي لها بعض الاشياء بس عشان حماسكم للغرفه نزلت لكم الصور ،، 

واخترت هالابجوره اللي تتعلق بالسقف 

اخذتها من ايكيا ،، واذكر ان سعرها كان رخيص ،، 

ونجي لآ هم شيء بالغرفه ،، 

السرير ،،  سويته عند نجار جبت له صوره وقلت له ابغاها مثلها ،، وتقريبا ٨٠ بالميه سواها مثل ماابغى ،،  المحل اسمه الدخيل لغرف الاطفال بمخرج ٩ متخصصين بغرف الاطفال ،، سعرها كان ب٣٠٠٠ سريرين وكوميدينه بس كبيره شوي كانها تسريحه ،، 

وانا ماكنت ابغى دولاب لان فيه غرفة ملابس ،، 

مفرش السرير اخذته من الدبنهامز ب٨٠ ريال ،، والمخده اللي عليها صورة كمان من الدبنهامز ب٩٥ ريال والمخدات الثانيه 

من ايكيا ،، 

وكيس المخده هذا من بوتري بارن ،، يطرزون لك الاسم والعباره اللي انتي تحبينها ،، 

وهذي تفاصيل السرير ،،

ولاحظو ورق الجدران والنقشه اللي فيه ،، ناعمه مره ،، 

وهذي الكومودينا ،، وتسريحه بنفس الوقت ،، 

الادراج الصغيره اخذتها من دبنهامز ،، كانت طقم مع العلب ،، والاطار من روائع المكتبات 

والمرايه من سنتر بوينت ،، 

ووصلنا لنهاية التقرير اليوم ،، شكرا لكم كلكم وشكرا لانكم تحملتوني واسفه اني تآخرت عليكم ،،

وهذا فيديو بسيط للغرفه يارب يعجبكم ،،